ياقلب أختك.. شقيقة ضحية لقمة العيش بـ ليبيا: ملحقش يفرح|فيديو

تطورات مثيرة ومأساوية في حادث مقتل شاب بـ ليبيا ضحية لـ لقمة العيش، بعد أن قام أحد أصحاب العمل بإطلاق رصاص عليه وتوفى بسبب رفضه إعطائه 50 دينار، والتقى موقع تحيا مصر بـ شقيقة المجني عليه ضحية ليبيا.

شقيقة ضحية لقمة العيش في ليبيا: قلب أختك يامحمد

وقالت شقيقة ضحية لقمة العيش في ليبيا لـ موقع تحيا مصر، عمرك ما زعلت حد يا قلب أختك، ياحبيبي يا محمد غدروا بيك ياحبيبي، عايزين حقه واللي قتله يتقتل زي ما قتل محمد غدر وخلص عليه، ده كان عريس حسبي الله ونعم الوكيل ياحبيبي.

وتابعت شقيقة ضحية لقمة العيش في ليبيا، عريس في الجنة أخويا قلبي، كنت سبت المحل كله، ياريته خد كل حاجة وأنت محصلكش حاجة كل ده عشان 50 دينار حسبي الله ونعم الوكيل، ربنا ينتقم منه، وبعت لي صور خطيبته قبل ما يموت بكام ساعة.

شقيقة ضحية ليبيا: ملحقش يفرح وكان حاسس أنه هيموت

واستكملت شقيقة ضحية ليبيا، أخويا ملحق يفرح كان باعتلي صور خطيبته ويقولي شايفة، ورديت قولت له دي عسل ياحبيبي ربنا يهنيكم، ملحقش يفرح حبيبي قلب أخته منه لله اللي عمل كدة في محمد أخويا ربنا المنتقم منه حسبي الله ونعم الوكيل.

وأضافت شقيقة محمد ضحية لقمة العيش في ليبيا، محمد كان ملاك ماشي على الأرض وخلص جيشه عشان يتغرب ويجيب فلوس يتجوز بيها وكلمني قبل ما يموت على طول وكان حاسس أنه هيموت وكان كل شوية يرن عليا وأقوله بترن عليا ياقلبي يقولي بسأل عليكي أنتي وعيالك.

والد ضحية لقمة العيش يكشف تفاصيل وفاته

وأكد والد ضحية لقمة العيش في ليبيا، اللي قتله اسمه ربيع بلال مشارك 3 مصريين وخلص على ابني، ابني شغال في البركة في محل ودخل عليه المتهم قاله هات 50 دينار واتصل بأصحاب الشغل قالوله متديش حد حاجة، وهو قال يحافظ على فلوس صحاب الشغل.

واضاف والد ضحية لقمة العيش في ليبيا، اتصلوا بيا الصبح قالولي ابنك تعبان قولت لهم لا ابني مات أنا حاسس، ابني غلبان وكان شغال على لقمة عيشه ورايح ياكل عيش وكان جيشه في السلوم وسافر بعدها ليبيا وكان نازل يخطب بعد العيد بس الله يرحمه.

واستكمل والد ضحية ليبيا، يادوب خلص جيش في شهر سبتمبر وسافر وكان نفسه يفرح ويفرحني وينزل بعد العيد عشان يتجوز، والله العظيم من يوم ما شوفت الدنيا مشوفتش فرح وأخرتها ابني مات كان نفسي أفرح بيه وقولت ده فرحتي وخيري ملحقش يشتغل ولا يعمل لنفسه حاجة.