كنا بنصلي رجعنا لقينا الحريق|فيديو

كواليس وتفاصيل مأساوية في حريق منزل الدقهلية، والذي شهد تفحم جهاز عروسة داخل الشقة، ويرصج موقع تحيا مصر التفاصيل الكاملة في حريق شقة الدقهلية.

القصة الكاملة لـ حريق منزل الدقهلية

وقالت الأم في حريق منزل الدقهلية لـ موقع تحيا مصر، ربنا يعوض علينا كنا بنصلي التراويح لقينا أم حمادة صاحبة البيت بتقول الحقونا وتعالوا بسرعة النار والعة في البيت، وعقبال ما جينا نجري كانت الشقة كلها مولعة وبعدها سيارات الإطفاء جت لكن كانت النيران اقوى واسرع.

وتابعت الأم عن حريق منزل الدقهلية بمركز بني عبيد قائلة عفش شقة محمد راح ومعاه جهاز أخته العروسة، ومحمد منفصل عن مراته وقاعد هنا وكل حاجة راحت وقالولنا أن كل اللي حصل بسبب ماس كهربائي وأن سقف البيت خشب.

شاهدة عيان على الحريق: كنا نايمين ولقينا نار جهنم

وقالت أحدى الجيران الشاهدة على حريق منزل الدقهلية، كنا نايمين ولقينا مرة واحدة النار مسكت في البيت، والبيت ساكن فيه 7 بنات وأخوهم، وشقة محمد أخوهم هي اللي النار كلتها هي وجهاز واحدة من أخواته والشاشات راحت وكل حاجة في الشقة راحت.

وقالت العروسة صاحبة الجهاز الذي التهمته النيران، الشقة كان فيها حاجة أخويا وجهازي وبعد الفطار كنا قاعدين كلنا وأخويا قاعد معانا تحت ولقينا الجيران بتصوت وبتخبط علينا وبتقول الحقوا في حريقة، طلعت أشوف مبقتش شايفة حاجة من السحابة السوداء.

صاحبة الجهاز المحترق: كل حاجة راحت في ثانية

وتابعت العروسة صاحبة الجهاز الذي احترق في منزل الدقهلية، أنا عمري ما شوفت حريقة زي دي قبل كدة والبيت ده اللي مجمعنا كلنا وفي ثانية كله راح أنا أخويا عنده ظروف صحية وأختي منفصلة وكلنا على قد حالنا جدا ومحدش فينا متوظف وبناخد معاش أبويا بعد ما مات.

حيث اندلع حريق في منزل بمركز بني عبدي في الدقهلية نتج عنه تفحم محتويات الشقة بالكامل وجهاز عروسة بداخله، وتم السيطرة على الحريق بدون إصابات أو خسائر بشرية في الحادث، وتحرر المحضر اللازم وتم إتخاذ الإجراءات القانونية اللازمة.

حريق يلتهم شقة سكنية في منزل بـ الدقهلية

تلقت الأجهزة الأمنية بمديرية أمن الدقهلية اخطارا من غرفة عمليات النجدة تضمن ورود بلاغا من الأهالي بنشوب حريق داخل منزل بنطاق مركز بني عبيد وعلى الفور تم الدفع بسيارتين إطفاء للسيطرة على الحريق وإخماده ومنع امتداده.

ونجحت أجهزة الحماية المدنية في الدقهلية في السيطرة على الحريق وإخماده ومنع امتداده بدون وقوع إصابات أو خسائر بشرية وتحرر المحضر اللازم وأمرت النيابة العامة بانتداب الأدلة الجنائية للوقوف على أسباب وملابسات الحريق.