عايزة اشوفك واشتغل معاك.. قابلني وشوفني أنا مؤهلة ولا لا

حرصت الفنانة منى فاروق على توجيه رسالة إلى الفنان تامر حسني، وذلك من خلال بث مباشر لها عبر حسابها الشخصي على موقع التواصل الاجتماعي تيك توك.

رسالة منى فاروق إلى تامر حسني

وقالت منى فاروق في البث المباشر الذي يرصده موقع تحيا مصر: أنا عايزاكم تسجلوا اللايف بالله عليكم، النهاردة أول يوم العيد، أنا ساكتة بقالي فترة كبيرة وبحاول أوصل لتامر حسني نجم الجيل بقالي شهور وبقالي أكتر من كام سنة، وكل ما أعمل فيديو وأقول المحاولة دي هتنجح مبتنجحش فإن شاء الله الفيديو ده ينجح، احنا في أيام مفترجة.

منى فاروق 

وتابعت: رسالة لنجم الجيل تامر حسني مباشرة لو سمحت أنا عايزة أشوفك، لو سمحت أنا عايزة أشتغل معاك قابلني واتكلم معايا وشوفني أنا مؤهلة أخد دور عندك في فيلم من أفلامك ولا لا ووالله لو مش مناسبة مش هزعل بس أبقى حاولت، وأنا عندي إيمان أن الباب دا هيتفتح.

منى فاروق: مش عارفة ادفع إيجار بيتي

وسبق وأن حرصت الفنانة منى فاروق التعليق على قرار اعتزالها، مؤكدة على أنها تريد العمل في الفن بشدة، وذلك من خلال منشور عبر حسابها الشخص على موقع تبادل الصور والفيديوهات إنستجرام.

منى فاروق 

وكتبت منى فاروق خلال خاصية استوري: مساء الخير.. الكلام اللي بقوله دا خارج خالص عن فكرة أني أخد التريند، واعمل زي أي حد.. أنا قولت اعتزلت الفن لسبب واحد.. دا مصدر رزقي الوحيد اللي أنا بحبه وعاوزة اشتغله، لكن لما أوصل لمرحلة أني مش عارفة ادفع إيجار بيتي.. حاجة تتعب.. أنا محتاجة اشتغل عشان أعيش زي أي بني آدمة طبيعية.

وتابعت: أنا غلطت وربنا بيسامح ليه البني آدمين مش عاوزين يسامحه.. أنا بسمع بودني لا بلاش منى عشان الفيلم والمسلسل ميتضرش، ليه ياربي أنا بقيت منبوذة من كل الناس، أنا مش طالبة غير أني اشتغل في الحاجة اللي بحبها عشان أعرف أعيش.. المجتمع حططني في المكان الوحش بس مش يمكن عاوزة أبقى كويسة زي أي واحدة، ليه بتقفلوها قدامي.

حسن شاكوش يدعو لـ منى فاروق

وعلى صعيد آخر، حرص مطرب المهرجانات الشعبية حسن شاكوش على الدعاء للفنانة منى فاروق وذلك خلال أداءه مناسك العمرة، حيث نشرت عبر حسابها الرسمي بموقع تبادل الصور والفيديوهات انستجرام من خلال خاصية ستوري فيديو لحسن شاكوش من أمام الكعبة وهو يدعوا لها بعودتها إلى الساحة الفنية من جديد.